பைத்தியக்கார மனது...

நீ சிரிக்கும் போது
உன் கன்னங்களில்
விழும் குழிகளில்
மட்டுமல்ல...

நீ
சூடான பாலை
தம்ளரில் எடுத்து
அது ஆறுவதற்காக
ஊதுகிறாயே
அப்போது அந்த பாலில்
விழும் குழியிலும்

விழுந்திருக்கிறது என்
பைத்தியக்கார மனது...

தோற்றே விட்டேனோ ???

விழுந்தேன் எழ முடியவில்லை
தாய் உதவினாள்
தவழும் போது

விழுந்தேன் எழ முடியவில்லை
தந்தை உதவினார்
படிப்பில் தோற்ற போது

விழுந்தேன் எழ முடியவில்லை
மனைவி உதவினாள்
தொழிலில் தோற்ற போது

விழுந்தேன் எழ முடியவில்லை
கைத்தடி உதவியது
கூனி குறுகிய போது

விழுந்தேன் எழவே முடியவில்லை
மூடிவிட்டார்கள்
கல்லறைக்குள் வைத்து

வாழ்வில் நான் தோற்றே விட்டேனோ ???

தேர்தல்

லட்டினை பாதுகாக்க
ஈக்களுக்கும்
எறும்புகளுக்கும்
இடையே
கடும் போட்டி...

முதல் கூலி

என் எட்டாவது வயதில்
நான் வாங்கிய முதல் கூலி
விளம்பர பலகை ஏந்தியதற்கு

"குழந்தை தொழிலாளர் ஒழிப்போம்" என்று...

நீ தரும் நினைவு

சிறு நெல்லிக்காயில்
உன் நுனி நாக்கினால்
எச்சில் வைத்து

அந்த ஈரத்தில்
உப்பினை தடவி
எனக்கு தரும் போதும்

நினைவுபடுத்துகிறாய்
என் அம்மாவையே ............

நன்றி

நீ என் தோள் சாய்ந்து
தூங்கிக் கொண்டிருந்தாய்...

நான் உன்னை பற்றியே
கவலை கொண்டிருந்தேன்...

அப்போது
உன் கூந்தலினால்
என் கன்னங்களை
பரிசிக்க செய்து
ஆறுதல்படுத்தியது
ஜன்னலில் புகுந்த
தென்றல் காற்று....

என் கண்களும்
கவலை மறந்து
இமைகளை
போர்த்திக்கொண்டு
தூங்க ஆரம்பித்தன...

நன்றி
தென்றலுக்கா ??
உன் கூந்தலுக்கா ???